رأي و تعبير

‪
ڭُولُو ألَّا، تڭالِّيكُم
أَجي بعدا غسلتو يدِّيكُم
و لَّا باركين تحنِّيو على الخْنْزْ
كِيمْوَالْفَا لِيكُمْ
و لَّا ڭاعدين على الطّْنْز
و لَّا عَا مْعَاوْدين ليكم
وا الشَّعب! معاكم داويين

ڭالّيك الفصل سبعة و ربعين
نقصو لينا الفصول و زيدونا المعلِّمين
ربعة د الفصول هما اللِّي عارفين
الشتى طاحت ڭولو العام زين

و بلَّاتي بعدا، علاش ألَّا
علاش ما نڭولوش خطرة ألَّا
و نْبْيّْنُو العلّة
و نوقّْفو البيضة فالطّاس
و نعرِّيوْ السّْلَّة
و نشوفو لاش هاد الحفلة
و نفضِّيو من التَّبهلَة
و اللِّي بغى علينا يتفلَّى
هاد الخطرة نڭولو ألَّا
و اللِّي بغى يبيع المْلَّة
نڭولو ألَّا
و مول هاك بالاك
نڭولو حدّك تمَّاك
و مول الهضرة دالكيلو
يمشي لحال سبيلو

أَمَّا اللِّي مخلوع من ألَّا
اللِّي باقي ما باراكاش من الخوف
و الخوف خاوي لو الجُّوف
كاين الزّْرادي مولاتي
كاين الڭياطن ألالا
َّكاين كيسان الحياتي
و الڭصاعي و الطوابل و الحوَالَى
ياكل و يشرب و يحمد
و يْتْسْتْعْبْدْ

Barça Vs Real (être ou ne pas ...)

البارح ڭارح

بغواتك نايح

"سبانيا مولات الفضايح"

خرج السّاكن و جا السّايح

ها النّايض و ها الطّايح

ڭالو 3 دلميون مساطح



و اليوم ريح الفرحة فايح

بنادم حوايجو لايح

فكل مكان يبرّح

الكلاسيكو البارح

أخاي كان محيّح



خمسة لزيرو

و كيف نديرو

ربحنا ڭالو

و شكون احنا

احنا د اليوم

ولاّ احنا د البارح



واش كلامي واضح؟

بْرِيَّة تْلْفْتْ لَيَّ

أَشْ دْرْتِي تَانِي
أَمُول اللّْوَانِي
حْرْقْتِي السّْدَادْرْ
فْرّْشْتِي الهْيَاضْرْ
لْدُوكْ الكْياضْر
اصْحَابْ البْكْيَة دْبْلْعَانِي

اعْطَاوْ مْلْيُونْ لْلرَّاسْ
وْ مَا عْجْبْهُمش الحَالْ النَّاسْ
نَاضْتْ رْوِينَة وْ خْلاَصْ
تْقُولْ المْيّْتْ أَلْمَانِي

يَاكْ لْبْسُو الجْلاَلْبْ
وْ جَابُو السّْكَرْ قْوَالْبْ
وْ قَالُو الله غَالْبْ
هَا حْقّْ العَامِلْ فْالصّْنْدُوق الوَطَنِي

هُومَا بْالله والشّْرْعْ
وْ بْمُولْ اللّْوَانِي المْبْرّْعْ
وْ بْمُولْ السّْمْطَة اللِّي تْفْرْقَعْ
وْ بْشْعْب كُلُّو كَيْعَانِي

إِلَى مَا كُلّْ هَا يْشْدّْ قْنْتُو
وْ يْتْسْنَّى بْهُدُوءْ نُوبْتُو
وْ يْسْدّْ بْخَاطْرُو خْرْبْتُو
إِلَى بْغَى يْعِيشْ هَانِي

Morrocan playlist

دراري ديال الراپ تاني
؟ ما عجبك حال؟Hkayn

خلّي البشر يغنّي
يا كما جاك لحسد أ بوقال؟

« ديال هانا تاني » piessates ضرب ليك شي
les festivals ف t’spoupa و طلع

ماشي الحسد اللّي هضّرني
راها لغيرة على فن تباع بريال

Miami أولا LA هادي ماشي Casa
تچول الدراري واكلين التوكال

وهال لعدو تفرقو منّي flow هال crew هال
اعطيتوني مزيان فودنيَّ موسيقة البال

التجديد مشي هي بو لحية راه جهاد وطني
أولا الشباب راح و زال؟

أ نعيمة أ عبد الهادي أ الطيب عنداكو تخِّليوني
راه طال عليَّ الغياب و صبري طال

أعباد الله دوقوا الفن المغربي و دوقوني
الكوميرسيال BEAT و رخفوا علي من ل

مستقبل

le revoilà !!
دربنا درب شعبي
فيه المزيان و الخايب، الباين و المخبّي
عرفت شبّانو صغار، ها مول الكورة، ها مول البِيّ
كاين اللّي صدق, كاين اللّي مشات أيّامو فالسكبِّي
كاين فيهم اللّي خاسر و كاين المربّي
دربنا درب كيما بغى ربّي

و طرت , طار السّرب، و صاط فالدرب، الشرچي و الغربي
و رجعت ,رجع العصر, فيه تعوّدت ندّاكر، مع أولاد دربي

شفت وليدات صغار
دايرين زبايل كبار
قلت لهم أودّي علاش

تالفين وسط البشر
كولة شيفون أو زيزوار
قالو لي هادو أوباش

"راهم إمّا شمكار
إمّا اصبيطار
و إمّا شفّار
كيقلّب كيفاش

واحد ديك النهار،
حصلوه فواحد البار
داير واحد الفلاش

هلكوه بالعصى الرجال
و عيطو لاصحاب الحال
رماوه فعكاش

عينيه فحال الغول
، حتى حاجة فيه ما تچول
ما واصلش لربعطاش"

مشيت العين دامعة و القلب حزين،
على دوك الدراري المساكين
اللّي عمرهم ما عرفو صدر حنين
و, فالزناقي يضلّو دايعين

هادا يضرب
هادا يزف
هادا ينعل الوالدين

شكون يأدب
شكون ينصف
شكون ياخد باليدّين

وليداتنا وليدات بلادي غاليين
هما راس المال هما الفضل هما قرة العين
المدرسة مُوضْعْهم ماشي جامع الفنا أولا الهديم

لوح مرّة عينيك جيهتنا
يا الغافل ولّا انت مشي من هنا
خلّيك مع دوك النّاعسين فالهنا
اللّي ما عندهم كََصَار فينا احنا
ولا فوليداتنا
صافي و خلاص راه بانت المعنى

أولاد عبد الصمد

ثلاثة انتخمو على جوج و اربح واحد
هاد القصة طلعات لي فالرّاس ما بقى ما يتعاود
نفس الجّوج و نفس الواحد مصدعينّا عاود

چالّك نخّم و اعزل عودك بين الأعواد
ياك هاد النّوبة ما جمعوكومش فالكاميونات القيّاد
و را مغنصوّت على تَّ شي ٠٠٠ وقلب عليَّ أ عبد الصمد

إلى بغيتي تعرف علاش ما صوتوش الجواد
حلّ عينيك و ودنيك و افهم شنو واقع فالبلاد
الشارع غوّت: ״ديموقراطية الغش كولوها أولاد٠٠٠!״

كلامي منقّط حيت طلع ليَ الچاز٫ ناض ليَ القوق وسال المداد

على أيّامنا اللّي ضايعة نتسنّاو في المدد المدد و اسقيونا بالمدد
ولّا ضرقو زلايفكم إلا حتّى حد فيكم ما قاد
راه جات نوبتنا جينا و جايبين أفكار اجداد

على وليداتنا و اخّوتنا اللّي بديملوماتهم عدد
هلكتوهم بالحچرة و الضرب و منتدى السؤدد

ربطتوهوم بالزريقة يدورو فالدروبة ربطة الكلاب
ينبحوا ها القرد ها الزرافة هاااااااا ما تسواو ألأحزاب
نصيحة! عاودو النََّضَر قبل ما يبان ليكم العَجَب
راه الجواد ثار فدمهم الغضَب
إلى اليوم ماصوتوش راه مشي بلا سبب

راه حيت ثلاثة انتخمو على جوج و اربح واحد
و هما ما بغاو لا دوك الجّوج لا داك الواحد

سسسسسس

قطع الياس
و احني الرّاس
و اقبط فاليد اللّي كتباس
و عنداك تغلط أ عبّاس
تصدق مخرّق كِالكسكاس

هاد شي قديم قالت الناس
اليوم اتعاود لبني من السّاس
ياك خرجو المعتقلين من الحباس
و بوليسنا ولّى عندو إحساس
و اطلقات اللسونات بلى عسّاس
شي امضى من السيف و شي قرطاس

واش شفتي بعينيك اللباس؟
ها الّنينجا ها المعرّي على اللّاص
و البرامِج الانتخابية د الفلاس
غنديرو غنفعلو وا غي اسكت وخلاص

نسبة الأميّة فايتة القياس
واش نتحركو قبل ما تطيح الفاس
ولّا نبقاو ناسيين الخَوَى حاضيين التهراس
ما حدنا كنچولو لبعضنا اكحل الرّاس
هير الله يحد الباس

الچوال

Toujours sur le registre du recyclage et du plaisir de partager, un petit texte caché

الهتوف الهتوف

حاضيين غير الچوال و الچوالان والچول و لانكول


الچوال چال

الچوال چال عييت من الغنى بحال و بلا حال


عييت من المتكية على الحيوط و خدمة المرسال

ما ابقى حتى حيط ابغينا نوبتنا أولا هذا محال


ضحك لچوال و بكى حتى مال

شاف العين واكحة و المجرم مازال

سرق هنا عمي لهيه و حتى حد من غيرهم ما كال


ضحك لچوال و بكى على جماع المال

اربح وخبع,ارشي و غني الموال

واه على البلا د! واه على البلا د!الچوال ولّى ولوال


l’voile بكى لچوال وبرّد على اللحية و


لاش ارجعتوا؟ ياك ادفنتونا هذا شحال

وقفتوا العلم و ارميتونا للجهال

احفظ بلا ما يفهم و احكم و صال و جال


بكى لچوال وبرد على اصحاب الحال

كلينا و اشربنا بقى غير لقداح و السلسال

شعر الفار, لسان الحمار و مخ البغال

وا العفو,العفو من هاذ الحال

بكى لچوال وبرد على ضعف الرجال

جري و جاري و اشتف على قبل ريال

كوله و انسى كلشي فحال فحال

بكى لچوال وبرد على هاذ الحال اللي طال

انسينا شكون احنا ولينا عايشين اذلال

واش غانبقاوا ها كذا أجيال و أجيال ؟

ابكى الچوال و طوح على هم زعزغ الجبال
ابكى الچوال وتفر شخ على أرض تنزع منها الأ مل

نشيد

طان طنن طننان

اسمع أخويا صوت الوطن

شي يجري و هو حفيان

هزّ الدّراپّو فالميريكان



شي يحچر خوه الإنسان

و عند بالو بّات الإحسان

مربّي اللحية راية الإسلام

يحارب الفسق فيمّا كان

الفقر شويّا ويكون حرام

و انت علينا بعن فلان أو فلان


شي كرفصها مزيان

خلّى قاع الخزينة كيبان

تخلطو ليه فلوسو مع المال العام

راه كيخبع لدواير الزمان

خاصو شي دورة فالبرلمان

باش يشري الفونطوم للمادام



شي ما لقى للدّوا اسنان

فالصبيطار ׳سير شري׳ هو العنوان

و عندنا شي فرمليات سمان

يطيحو الضّيم٫ يجيبو التمام

و شي عندو سويت فآل نهيان

مَجايب اخبار لهاد العالم

فرميالتو ديال الأفلام

ميكرهش يبقى ديما عيّان



شي مشى قرى اللّي كان

و كمّلها فراس الدرب بالجّوان

شي رجع من روسيا فرمسيان

شي من پلومبي لطبيب دسنان

شي طردوه من الكاطريام

ميعرف حتّى يتهجى الجورنان

الأمِّية و الجهل قتلو أجيال

بالسّيف ما السّعود ميشرونى بريال


بلاد ناسية كل فنان

شي سكران و شي جيعان

الكاتب و الشاعر و الرسام

Sont tous logés à la même enseigne

أمّا ديك الرطِم أولا الدوزيم

كيكلخو الواحد بالبيان

أدَّو المهمة بكل أمان

حتّى الناس سمّات نيللي و شريهان


الحفاة يتطاولو فالبنيان

قادّو اللبس و طولو اللسان

شي كيبني بلا بلان

جميلنا فتدلّاكت و الرخام

شي بني هي الله يحفظ والسلام

و فين هي وزارة الإسكان؟


شي هلكو غلا الأتمان

ضاعت أيامو بكا و أحلام

حامد ربّو رب الأنام

و حاقد على دوك العديان

شي يقضي بلّي كاين

و شي قضاة معندهم ميزان



و بكيت الدم على الشبان

شي حارچ و شي هربان

الراس مغطّي والباقي عريان

و شي تالفة لمّو ليام


كيما كيچولو سيادنا القدام

الصلاة على النبي مسك الختام

كان يا سيدي يا مكان

بلاد طان طنن طننان

ليست إلا كلمات

Toujours à la marge de la campagne qui bat son plein, mes mots ressortent.
Excusez le recyclage.
الاستقلال مقطع احباله
الحركات كلها سكون

الاتحاد خوى بخلانه
و العدالة بغات تخون

خليو التجمع فحالو
الحربالغمزة والقاري مدفون

الخراز يوجد نعاله
l’urne فردة قبل و فردة بعد

اصحابنا صالو و جالو
شكون قال أنا شكون

اصواتهم بحت اناشيدهم اذبالو
كل واحد فيهم بالسلطة مفتون

هذا مسكين كرسيه مشالو
فين ينعس فين يبان فالتلفزيون

تقول مول الدار مخليهالو
ما هامو لا أمة لا قانون

ثمة يطبخ ثمة يرمي ازبالو
حتى ريحة ما تغلب الصابون

الاستغلال غيلقى افعالو
الحرقات خلاو القرى و المدن

الاستبداد لوى ذراع مثالو
والعمالة بدلت اللون

مرض على غفلة

Suite au billet de Hmida, j'ai décidé de republier une série de poèmes que j'avais postés il y a un petit moment.
صوتي عاود مبحوح
ضربني برد الانتخامات

غلطت و خليت الشرجم مفتوح
تقت و نعست شي سويعات

فقت مغموم قلبي ضايقة الروح
حسيت بحال إلى الوقت تزيرات

طليت لقيت شي يهتف شي هاز اللوح
چلت هذا هو حريق الانتخامات

هبطت نسول ونطلب الشروح
واش يكفي السيرو ولا لابد القويلبات

واش الحق بالاشتراك مسموح
ولا نشوفو, نسكتو و نصيفطو الفليسات

چالك انت مريض و حلقك مجروح
اطلع تغطى وانعس راه الوقت فات

يمين و شمال راميين نفس الفتوح
لاش مضيعين الستيلو و الروشيتات

حتى عشاب منهم بسره ما يبوح
بلحق تچول واحد اللي معمر ليهم چاع الوريقات

چالك الانتقال الضيق مراضي چلتله المريض مليوح
كتفكروه مرة كل خمس سنوات

صوتى ضعيف لكن مشي ممنوح
طلعت, سديت الشرجم و نسيت حريق الانتخامات

العفطة

Je viens d'apprendre cette nouvelle vague de repression, je me permets de republier un vieux billet qui continue à trouver tout son sens

صباط الخوف عاود بان

حتى فم ما بقى لو أمان

شي قلب الفيستة و خبع الأقلام

شي السورسي كفاه شي الغرامة عدفاتو الأيام

بو بكر عيى وطج و أحمد غيتربى مزيان

الرزين يدير بكلام زمان

و يحني مع الريح كقطيب الخيزران

يتسنى تدوز الحملة ولو تدوم عوام

الخفيف ما يتهنى طالق حلقو فكل مكان

يقلّب على مول الصباط هدام الأفمام

يلقاه و يرجع يبكي بلا سنان

بغيتي حرية التعبير و كان ؟

فوت مول الصباط و قني أ فلان

ياك البارح عاد كنت جيعان

تحليك الدرقوش وليتي فنان

وا قلب علي و سير تكمش فشي كوان

الهضرة اللي بقوامها ما تعجب أذان

الناس خاصها ختي روبي و نانسي عجرم

كيما ديما أبياتي ولاو أحزان

واحد الغوتة قبل لا ّفان

حماة الحرية "لا إستسلام!!"

أيام الورد و البارود

أيام الورد و البارود
جنّة الدم تخطّات الحدود
قلّة المال و الحچرة و الأمل المفقود
الجهل و الّلحية و بنات السّعود
و سيايات الطريق المسدود
عمّرو بالكره القلب الجحود
يا غاصب الشبان راك بالنار موعود
قنابلك استسلام و لحني صمود
ربّي مولاي
يسمع دعاي
و يمحق تجار السجود

أضحية

ذبحنا كبش الأمل

من ﭽرونو دارو زمارة

حلّلناه حيت اتصاب بالسل

هدا ما ﭽالت رباعة الﭽزارة

تداورو عليه بالجناوى من قبل

نجى بالحق ما رحموهش الغدارة

تبعوه ونصبو ليه فراس الجبل

ما ارتاحو حتى بلاو ليه بالدوارة

ودابا ملي كلاوه شنو الحل؟

ما تضرب حسبة الزريبة عمّارة

ما تقيسوش غير نعجة الذل

و الباقي حلال على الشفارة

العطلى

مرحبا بكم فبلادكم

جيتو معمرين جيابكم؟

كيتسناكم PIBلا هيرحيت ل'

خاصه ديك البركة ديالكم

عُشرو من عشوركم

دايرين شي انتخامات حشاكم

ما تصوطو حد ما تبرزطو راسكم

انتوما هي ارتاحو فداركم

متقلين بالكادويات لاحبابكم

الله يحسن عوانكم

حتى حد ما عادركم

ياك معمرين بعدا جيابكم

وا المازوط هلكنا فغيابكم

و التعليم كرفص ولادكم

وكن جبتو شي دوا للطبيطار معاكم

و المحكمة كلها صداع نساوها من بالكم

العطلة سالات و جمعو راسكم

اللي عندو شي مركوب ينوض يالله نوصلكم

واو! شديتو اللّويّن و خففتو تقلكم

الطريق السلامة الله يعاونكم

العام الجاي بالأغاني نتسناوكم

"أنت قرة العين فالصمايم

أنت العزوة فالليالي

آرى وانقص من الفهايم

ياك تعرضنا ليك بلالة و مالي"

انتظار

رجع غدّا
و صافي رجع غدّا
ولا يني مصيبة هادا
و ﭽلتليك رجع غدّا!
جاي على قبل شي شهادة؟
و راه الشاف مشى يتغدى
هدي العشرة و مشى يتغدى
خصو ياكل بكري ضاره المعدة
وانتا مشي شغلك أجلدة
بغيتي تسناه وقف حدى المردة
مغيرجعش قبل الوحدة
من بعد خاصو القهوة كالقاعدة
واش وراقك كلها واجدة؟
أنشوف هاد الضوسيي بعدا
ما لو مدكس كشي مخدة؟

خايف لا تكون شي ورقة زايدة؟
و راهم زادو ورقة جديدة

ورقة زوينة ورقة مجبدة
ورقة حنينة بها نبدى
ورقة بين الاوراق مكمدة
بها تدهن السير بها الكل يندى
باين على حالتك ما عندك جهدها
إيوا كيف ﭽلتليك رجع غدّا!!

متاهات

حرك سوارت الربح
دخّل للديور الهنا و الفرح
تصبني بتيد؟ اربحتي قدح
لحقتي الدچيچ؟ بقى غير الملح؟
خلينا من الهضرة البايتة واراك للصح
أراك لكروش الجايعة
أراك للي قتله الشح
شوف الچزارة خايدين غير دبح
أراك للسقايات اليابسة
أراك للبير اللي وكح
عيش أخويا و خلي كحل الراس يچندح
اللي ندب طارو ظفاره و ما بقى حتى چدح
إيوا موت و اتهنى إلى ما بقى ما يتصلح

صباح الخير

صبح صباح الخير
على الله يكون التيسير
أنوض أفلان باركة من الشخير
علاش غدي نوض عييت من العصير
من التجماع فراس الدرب والنميمة و السهير
عييت من تبدال حيط بحيط و التفكير
فهاد العيشة و شنو نقدر ندير
چاع البيبان مسدودة أولا محلولة للغير
لاصحاب اليدين الطوال لاصحاب الرشوة و التزوير
أنوض اتچعد توكل على الله و سير
تحرك و خلي إيمانك فاالله كبير
اشنوا ؟؟ نسرح بالهندي نبيع الديسير
و مال الهندي ؟ ماشي حسن من التشمكير
ولا ولفتي القهوة و الچارو وچلسة الكمسير
راه بلاد الشباب الضايع بلاد مرمي فالبير
بيك بنا البلاد يتقدم و يصير
مغربنا اللي حلمنا به كثير

Feu Croates

كرواتيا الليل شبع
اسمح لي خويا مردة

ضربك باين خيانته تلدع
كان صايم مابقى يفلت زردة

كرواتيا الليل دلع
العقل طار مابقات غير الكسدة

الضرب و السب خلا ص القمع
نسى عصيره فالدرب نسى الجردة

كرواتيا الليل طمع
مطورو يهز و يبيع فالخردة

حتى حد منو ما يمنع
هاد شي ما خاص لكحل الفردة

كرواتيا الليل ما يقنع
يجمع ويخبع لوقت الشدة

لوقت ماله فيه ماينفع
لوقت الحساب فيه يبدى

la n8!

عمر الليل طويل

ضاق بي الحال

وقتاش السور يميل

ويتهنى عليك البال

هاذ شي تقال قبيل

حفظنا هاذ الموال

هاذي هضرة الهبيل

الخواف قليل الفعال

واطلق مني أالويل

ما مساليش لاصحاب الامثال

والتعليم و الثقافة و التمثيل؟

شكون يسمح فالمال

و الدين؟ و الخوف و التهويل؟

واحسن من ضريب الفال

القمع تحول تضليل

الطرش كيصنع الرجال

الجهل كيسهل التذليل

والطمع يقتل النضال

أرى ما عندك يا ليل

أيامك تطول و تطوال