ڭُولُو ألَّا، تڭالِّيكُم
أَجي بعدا غسلتو يدِّيكُم
و لَّا باركين تحنِّيو على الخْنْزْ
كِيمْوَالْفَا لِيكُمْ
و لَّا ڭاعدين على الطّْنْز
و لَّا عَا مْعَاوْدين ليكم
وا الشَّعب! معاكم داويين
ڭالّيك الفصل سبعة و ربعين
نقصو لينا الفصول و زيدونا المعلِّمين
ربعة د الفصول هما اللِّي عارفين
الشتى طاحت ڭولو العام زين
و بلَّاتي بعدا، علاش ألَّا
علاش ما نڭولوش خطرة ألَّا
و نْبْيّْنُو العلّة
و نوقّْفو البيضة فالطّاس
و نعرِّيوْ السّْلَّة
و نشوفو لاش هاد الحفلة
و نفضِّيو من التَّبهلَة
و اللِّي بغى علينا يتفلَّى
هاد الخطرة نڭولو ألَّا
و اللِّي بغى يبيع المْلَّة
نڭولو ألَّا
و مول هاك بالاك
نڭولو حدّك تمَّاك
و مول الهضرة دالكيلو
يمشي لحال سبيلو
أَمَّا اللِّي مخلوع من ألَّا
اللِّي باقي ما باراكاش من الخوف
و الخوف خاوي لو الجُّوف
كاين الزّْرادي مولاتي
كاين الڭياطن ألالا
َّكاين كيسان الحياتي
و الڭصاعي و الطوابل و الحوَالَى
ياكل و يشرب و يحمد
و يْتْسْتْعْبْدْ
1 commentaire:
J'adooooooooooore :)
Merci pour ces mots qui me parlent
Enregistrer un commentaire